Orozkoko Gazte Asanbladak bi deialdi zabaldu ditu gaztetxea ixteko agindua salatzeko. Bihar Zubiaurren elkarretaratzea egingo dute 20:00etan eta ostiralean 19:00etan mobilizazio zaratatsua.
Momentuz, gazteek ez dute erabaki zein izango den bere jarrera itxieraren inguruan bide ezberdinak aztertu arte. Aurrean dituzten hiru aukera, haien aburuz, irtenbide legala, udalarekin akordioa edo erresistentzia dira.
Momentuz, lokalaren jabeak igandera arte luzatu die gauzak ateratzeko epea. Hedabideetara bidalitako oharrean, Gazte Asanbladako kideek azpimarratu dute alkateak ez duela beraiekin hitz egin nahi.
Josu San Pedro alkateak, ordea, adierazi du inork ez diola deitu eta prest dagoela hitz egiteko. Alkateak nabarmendu du ixteko agindua ez dela hustea: “hau ez da Kukutza”, esan du. San Pedrok argudiatu du Gaztetxeak ez dituela hainbat konpromiso bete (ordutegiak, kontzertuak, garbiketa, talde politiko batek erabili du eta ez Gazte Asanbladak, aurreikusita ez zeuden ekintzak egitea...) elkarbizitza arazoak sortuz eta horren ondorioz eman dutela ixteko agindua.
Hala ere, Gaztetxearen jarduera legalizatuz gero, Udalak ezingo lukeela lokalaren irekiera eragotzi gaineratu du alkateak.
Gazte Asanbladaren bozeramaile batek, ordea, adierazi du beraientzat ezinezkoa dela jarduera-lizentzia eskuratzea.