Presatxuaurre eta Saldruganeko "mendi komunalak" berreskuratu ditu Orozkoko Udalak. “Udalarenak ziren zenbait lursailek publikoak izateari utzi diote esku pribatuetara pasatzeko, desamortizazio, salmenta, usurpatze edota akatsak medio”, adierazi dute udaletik. Lur horietako batzuen egoera “gaur egungo errealitatearekin” bat datorrela azaldu du instituzioak, baina beste batzuk “ikertu” egin dituzte, “azaleraren gaineko kointzidentzia ezagatik”.
Hori da Presatxuaurre eta Saldruganen kasua. “ Lehenengoan, parajeak 3638 m² zituen eta gaur egun 350 m²-rekin bakarrik agertzen da katastroan. Saldrugan herri-basoaren kasuan, lehen 5,7 hektarea zituen eta orain 2,7 hektarearekin dago katastroan”. Hori da “bi herri-baso horien mugarritzea” egitearen arrazoia, udaletik azaldu dutenez.
EH Bildu alde, EAJ abstentzioa
EH Bilduk mendien berreskurapenaren alde bozkatu zuen plenoan, Adieren udal gobernuarekin batera. EAJko zinegotziak, berriz, udalbatza aretotik atera ziren bozketan, argudiatuta zinegotzietako batek lur-eremu horiekin “interes-gatazka” duela.