Zirriborro bat egin du Udalbatzak, eta behin betiko araudia zehazteko batzar batzuk deituko dira
Herritarren parte hartzerako lehen araudiaren zirriborroa egin du Orozkoko Udalbatzak. "Herriko pertsona eta taldeek udal kudeaketan parte hartzeko eta euren kezkak eta helburuak adierazteko” dituzten bideak zehaztea izango da araudiaren helburua, Josu San Pedro alkatearen hitzetan.
Zirriborro hori Orozkoko bizilagun eta elkarteei banatzea da Udalaren asmoa. Ondoren, batzar batzuk deituko dira jendearen “proposamenak, iradokizunak eta ekarpenak” jasotzeko. Bildutako iritziak kontuan hartuko dira behin betiko araudia egiterako orduan. Araudiaren zirriborroak herritarren parte-hartzerako honako tresna hauek aitortzen ditu, besteak beste: auzo batzarra, osoko bilkuretan eta informazio batzordeetan parte hartzeko eskubidea eta entzunaldi publikoa izateko eskubidea.
Hori dela eta, alkateak herritarrak animatu ditu aipatutako bileretara joatera; horrela “herriko demokraziaren gardentasuna eta kalitatea” bermatuko direlako, San Pedroren iritziz.