Sukaldaritzak toki eta ekintza bereziak izango ditu Orozkoko jaietan. Larunbatean, egingo dute hala marmitako txapelketa nola garrafa lehiaketa. 10:00etan bertaratu beharko dira eskolako patio estalira marmitakoa prestatzeko asmoa dutenak.
Garrafak egiteko hitzordua, aldiz, 11.00etan izango da; Zubiaur plazan. 13:00etan banatuko dituzte Orozkon hain estimatua den edariaren sariak; eta 14:15ean marmitakoarenak.
Ordura arte, baina, bestelako ekitaldiak ere egongo dira. 11:30ean, esaterako, pilota partidak eskainiko ditu Olgetan elkarteak. 12:00etan, berriz, zekorrak aterako dituzte plazara. Euskal dantzen zaleek, ordea, 12:30ean izango dute hitzordua, San Roke musika bandarekin Ubixeta taldearen ikuskizuna jasoko baitu Zubiaur plazak.
Iluntzean mariatxiek girotuko dute frontoi gunea, "Los txamukos" musika taldeak, hain zuzen. Irrintziak entzuteko parada ere edukiko du hurbiltzen den orok, 23:00etan txapelketa egongo baita. Gauean, kontzertuak izango dira nagusi: Lagrimas de sangre taldeak joko du Gorbeia kalean, eta Diskodantzak Zubiaur plazan.
Zapatu morea
Bestalde, Matxintxuk, Supelaurrek eta Kolometak deituta, "zapatu morea" egingo dute txosnagunean. 19:00etan Mamimiki batukadak abiatuko du ekimena, eta Kancaneo taldearen "Pa ti pa mi " antzezlanak emango dio segida. 21:30ean ekitaldi feminista deitu dute, eta gauean "Mafalda" eta Aneguria musika taldeak taularatuko dira.