2018an hainbat ordenantza fiskal moldatzea erabaki du Orozkoko Udalak. KPIaren (Kontsumo Prezio Indizea) araberako igoera ezarriko du (aurten % 1,8koa izango da). Hala ere, Donibane Aretoko zinema eskaintzaren prezioari ez zaio igoera hori aplikatuko. 50 zentimo garestituko da sarrera, espazioa eta zerbitzua hobetu dela argudiatuta.
Etxebizitza hutsen gaineko errekargua
Moldaketa bat egin da baita ere Ondasun Higiezeinen Gaineko zergan, zehazteko Ibarra auzoko etxebizitza hutsei ez zaiela errekargua aplikatuko. Iaz hasi ziren herriko etxebizitza hutsei zerga hori aplikatzen, baina auzoak ordaintzetik salbuetsita geratu ziren, “erdigunean dauden zerbitzua eta baliabideak ez dituztelako”. Hala azaldu du Josu Sanpedro alkateak. “Ibarra auzoa hirigunean dago ofizialki, baina ez ditu zerbitzu eta baliabide horiek. Horregatik erabaki da bertako etxebizitzei ere errekargua ez aplikatzea”.
Euskara ikastea sustatzeko hobariak
Hortaz gain, ordenantzetan zehaztu da euskara ikasteagatik % 75ko hobaria lan merkatuan dauden langabetuei soilik aplikatuko zaiela, ikasleei %50koa ezartzen zaielako.