Kontatuko diguzu nola sortu zen ideia, baita noiz heldu zineten eta noiz itzuliko zareten?
Betidanik nahi izan dut boluntario lana egitea. Orain dela 3 hilabete, Facebooken ikertzen nengoela, "Acción Directa Sierra Norte" elkartearen bideo bat ikusi nuen bat-batean.
Izugarri gogoko izan nuen, eta nire bikoteari aipatu nion. Asko pentsatu barik, mezu bat idatzi nien gure laguntza eskaintzeko eta geneuzkan gogoak adierazita. Beraz, urtarrilaren 9an, Greziara abiatu ginen. Hemen, 24ra arte egongo gara. Bi aste, gure oporrak!
Norekin lan egiten duzue eta non zehazki?
Polikastron gaude, Greziako iparraldean. Iazko otsailean, Juliok, elkartearen presidenteak, okindegi txiki bat ireki zuen, kanpamentuan eta kalean bizi diren errefuxiatuentzako ogia egiteko. Hemen dagoen kanpalekuak Nea Kabala du izena.
Zer egiten duzue zehazki eta zenbat orduz?
Egunero, 1.000 ogi inguru egiten ditugu. Okindegian hiru errefuxiatu daude lanean eta ogi arabiarra egiten dugu; hau da, crepe moduko ogia.
Madrilgo mutil batekin eta Kataluniako beste neska batekin gaude hemen. Pisu batean egiten dugu lo laurok.
8:30ean hasten gara lanean eta 17:00etan amaitzen dugu. Ogia egiten dugu eta gero kanpamentura joaten gara, ogi hori banatzera.
Pasa den astean ogi tailerra eman nien, ogi osasuntsuaren garrantziaz mintzatu ginen. Aste honetan madalenak egingo ditugu!
Nolakoa izaten ari da esperientzia?
Hemen aurkitu ditugun pertsonek, familiek, umeek... oso bidaia luze eta gogorra izan dute hona heltzeko, baina, irribarrea eta "eskerrik asko" hitzak ez zaizkie inoiz falta.
Gaur, adibidez, Aitor (nire bikotea) eta biok joan gara kanpamentura banaketa egitera, ume guztiak etorri dira jolastera, "ogia, ogia!" oihuka... oso momentu polita eta hunkigarria izan da. Ziur ez dugula inoiz ahaztuko!
Esperientzia pertsonala ez ezik, profesionala ere izango da. Beste kultura bateko ogia egiten ikasi dugu, haien eskuz, gainera. Beharbada, sartuko ditugu mota horretako jakiak noizbehinka okindegian, Orozkora eta Laudiora hemengo zati bat ere eramateko!