Aste honetan izan da Orozkoko udalbatza, eta erabateko adostasuna izan zen nagusi gai guztietan. Besteak beste, zergen gaiari heldu zioten sakonen. Batetik, gizarte ekintzetarako diru-laguntzak areagotzeko proposamena jakinarazi zuten; eta, bestetik, terrazen okupazioa mugatzeko ardura: "Planoa zerbitzu teknikoak egingo du, eta udalbatzak onartu beharko du terrazak jartzeko eremuaren mapa".
Euskaraldiari babesa
Halaber, Euskaraldira atxikitu zen Udala. "Euskara lehenetsi behar dugu. Bizikidetza osasuntsu baterako lehen urratsa euskara eta gaztelaniaren artean oreka lortzea da. Hizkuntza eta genero berdintasuna lortzea dugu helburu", adierazi zuen Begoñe Olabarria Adieko zinegotziak. Euskara biziberritzeko beharrezkotzat jo zuten norbanako, jendarte eta administrazioen ahalegina uztartu eta elikatzen jarraitzea. Orozkoko Udalbatzak Euskaraldiarekin bat egin zuen, horrenbestez.
Bestalde, larreen aprobetxamendurako araudia eguneratu zuten. Bizkaiko Foru Aldundiak, udaleko alderdiek eta herriko elkarteek batera osatu dute eranskina.
Udal beharginen aldaketak
Udaleko beharginen lan-saria hobetuko dute, %2.05ko igoera iragarri zuen Josu San Pedro alkateak. Ildo beretik, obretako udal brigadetako aldaketak azaldu zituzten: "Zerbitzuen batzordetik bi mugimendu egin dira. Bi postuen izendapenak ez datoz funtzioekin bat".
Argiztapenari dagokionez, kontratua luzatzeko beharra mahaigaineratu zuen alkateak. Apirileko udalbatzan onartu zuten egitasmoa, baina zehaztutako zereginetan ez ziren 10 horniketa aurreikusi. "Ondorioz, lizitazioa atera ordez logikoena da enpresa berarekin egitea". Oposizioak begi onez hartu zuen erabakia, denek bozkatu zuten alde, eta Imesapi enpresak helduko dio lanari.