Otsailaren 15ean emango diote amaiera Hilean Bariku Bat taldeko kideek musika jardun kolektiboari. Ezagutu infernua web-seriearen bidez jakinarazi dute berria. Jentilzulo Kulturguneko proiektua live session formatutik sortu zen, hileko azken ostiralean elkartzen zirela eta. Geroztik, makina bat auzo eta herri zeharkatu dituzte erromeriarekin girotzen.
Irati eta Garazi Santacruz trikitilarien esanetan, familia eratu dute taldekideen artean, kontzertuetan denbora asko pasa dutelako elkarrekin. Zutoia Latatu eta Irati Ussiaren hitzetan, "momentua iritsi da taldea uzteko, hau da guk erabaki dugun bidea baina jende guztia animatzen dugu honelako proiektuak sortu eta musikarekin gozatzera". Ibai Isusi bateria joleak eskerrak eman dizkie Hilean Bariku Bateko lehen proiektuan bildutako jendeari, baita kontzertuetan lagun izan dituztenei ere.
Azken kontzertuak
"Otsailaren 15ean guztiak gonbidatuta zaudete emango dugun azken kontzertura, Jentilzulo Kulturgunean", iragarri dute. Lehenago, baina, Laudioko gaztetxean joko dute, otsailaren 2an, hain zuzen.