aiaraldea.eus

Frankismo garaiko errepresaliatuak omenduko dituzte otsailean

Erabiltzailearen aurpegia Txabi Alvarado Bañares   Historia  Orozko

Frankismoak errepresalitutako bizilagunen omenezko eskultura inauguratuko dute otsailaren 16an, besteak beste.

Frankismo garaiko errepresaliatuak omenduko dituzte otsailean
Guda Zibilean zein Frankismoan errepresaliatutako bizilagunak omenduko dituzte. / Orozkoko Udala | Ikusi handiago | Argazki originala

Memoria historikoaren aldeko ekitaldia egingo dute Orozkon datorren otsailaren 16an. Herriarekin harremana izan dute eta frankismoan errepresaliatuak izan ziren pertsona guztiak omentzea izango da egitasmoaren xedea. Jose Lopez Tatok eginiko eskultura bat inauguratu dute horretarako, 13:00etan Lehendakaria Agirre plazan.

Ordu bat lehenago, baina, ekimenaren aurkezpena egingo dute Donibane aretoan. Josu Chueca historialariak hartuko du hitza bertan, eta bideo bat ere proiektatuko dute, hainbat familiaren testigantzak biltzen dituena.

Aurreko egunean -otsailak 15-, aldiz, Iñaki Egaña ikerlariak hartuko du hitza, Orozkotik harago solasaldian. Orozkoko Museoak, bere aldetik, gaiari buruzko erakusketa atondu du, hilabete osoan zehar ikusgai egongo dena.

Ehundik gora errepresaliatu
Duela zenbait hilabete ekin zion bizilagun talde batek memoria historikoa berreskuratzeko lehen pausoak emateari, udalarekin elkarlanean. Egin dituzte ikerketen arabera, ehundik gora errepresaliatu egon ziren Orozkon Frankismoaren ondorioz: 21 hildako, 79 zigortu,  bestelako errepresaliak jaso zituzten 8 kide eta San Martin auzoan derrigorrezko lanak egin behar izan zituzten 41 lagun. Hala ere, ekimenaren bultzatzaileek nabarmendu dute izenak falta direla, informazioa lortzea oso zaila suertatzen ari zaielako. Horregatik, gainontzeko herritarrei laguntza eskatu diete, oraingoa “lehen pausoa” baino ez dela iritzita.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa