Parte hartzerako ordenantza arautzen hasi dira, jaiak edota auzo batzarrak aitortzeko

Aitor Aspuru Saez 2019ko ots. 15a, 07:10

Udalbatzan landu zen ordenantza.

Aurrera egin zuen parte hartzerako ordenantzaren hasierako onarpenak astearteko Udal Osoko Bilkuran, Adieren eta EH Bilduren botoei esker. EAJ abstenitu egin da momentuz, behin betiko testua egon arte, gutxienez.

Adieko udal gobernu taldeak herritarren partaidetza arautzeko ordenantza proposamena eraman zuen udalbatzara asteartean. Zinegotziek adierazi zutenez, parte hartzearen esparruan azken 8 urteetan eman diren urratsak txertatu nahi dituzte udal jardueran, eta horretarako ezinbestekoa da ordenantza.

Talde independenteen bozekin eta EH Bilduren babesarekin egin zuen aurrera ekimenak. Koalizio independentistak nabarmendu zuen herritarren parte hartzea sustatzeko modu gehiago daudela eta Laudion zein hainbat herritan hori bistakoa dela. Hala ere, positibotzat jo zuen ordenantza eta eskatu zuen gardentasunean ere hobekuntzak egitea.

EAJ, ordea, abstenitu egin zen. Jeltzaleen ustez, etorkizuneko udal gobernu taldeen jarduera baldintzatuko du ordenantzak. Halaber, EAJk argitu zuen bere botoa alda daitekeela, behin betiko testua bozkatzen denean. Izan ere, momentuz, helegiteak aurkezteko epea ireki dute.

Ordenantza
Udalbatzan onartutako testuak jasotzen du, besteak beste, legealdi hasieran parte hartzerako batzordea sortu beharra dagoela. Zentzu berean, sail horri dagokion diru kopurua arautzen du, herritarrek bere proposamenak helarazi diezaieten udalari hurrengo aurrekontuetan sartzeko.

Horrez gain, arauak sortzean herritarren iritziak nola jaso behar diren aipatzen du ordenantzak. Testuak hainbat praktika zein erakunde aitortzen ditu: auzo batzarrak, auzo kontseiluak, jai batzordeak edota Antolinzaleak eta Erdu elkarteak. Espazio publikoa hobetzeko, berritzeko eta egokitzeko taldea ere aintzat hartzen du. Izan ere, Zubiaur Plazara ekimenak inguru horren aldaketa prestatu du udal teknikarien aholkularitzarekin. 

Gardentasunak ere tartea izan du ordenantzan. Esaterako, udalaren web atariaren etengabeko eguneraketa, sare sozialak, Orozko Gaur aldizkaria eta Induma informazio puntua aipatzen dira. 

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide