Abian dago Orozkoko Ezker Pareta eskupilota txapelketa herrikoiaren hirugarren edizioa. Izena emateko epea ireki dute dagoeneko. Maiatzaren 26a izango da inskribatzeko azken eguna. Bikoteek Arrugaetan, Itxinan edo Jentilzulo kulturgunean eman beharko dute izena, 20 euro ordainduta. Hiru baldintza bete beharko dituzte parte hartzaileek: 16 urte baino gehiago izatea, bikotekideetako bat gutxienez orozkokoa izatea eta federatu bakarra egotea.
Orozkoko plazako frontoian jokatuko dira partidu guztiak ostiral arratsaldetan eta larunbat goizetan.
Aspaldiko ekimena
Orozkoko Gazte Asanbladak antolatzen du norgehiagoka. Ibilbide laburra du ekimena, baina txapelketa herrikoia egitearen ohitura aspalditik dator, asanbladako kideek gogorarazi dutenez. “Orozkon eskupilota txapelketa herrikoia egiten zen”, azaldu dute, “herrian eskupilotarekiko zaletasun handia dagoenez arrakasta handia zuen txapelketak eta frontoia beti jendez gainezka egoten zen”. Horregatik erabaki zuten antolatzaileek txapelketa antolatzeari berriz ekitea, frontoiari “bizitza” emateko eta “eskupilota zale zaharrei” jolasteko aukera emateko.
Ekimenak geroz eta arrakasta handiagoa du, gazte asanbladako kideen hitzetan. “Gainera, bikote bakoitzean gutxienez herritar bat egon behar denez eta denon artean elkar ezagutzen dutenez euren artean pikeak sortzen dira eta horrek partidak interesgarriagoak izatea eragiten du”.
Nabarmendu dutenez, herriko hainbat taberna eta saltokiren babesa jasotzen dute ekimena aurrera ateratzeko. Horrez gain, tokiko rpoduktuen saski bat zozketatzen dute. “Finalaren egunean, Orozkoko jaietan, egiten da zozketa”.
