Bihar -maiatzak 18- egingo da Orozkorock jaialdiaren lehen edizioa. Zortzi talde igoko dira guztira oholtzara: Atom Rhumba, The Wizards, Eskean Kristo, Fetitxe, Moonshine Wagon, Pelax, Moonshakers eta Liher. 15:30ean irekiko dituzte kontzertuen guneko ateak. “Foodtruck” eta “merchandising” txokoak ere atonduko dituzte. Horrez gain, autobus zerbitzua eskainiko dute Orozkotik Laudiora itzultzeko, goizeko ordubietatik aurrera.
Sarrerek 18 euro balio dute lehiatilan eskuratuz gero (aurretik erosteko epea igaro da dagoeneko). Iragan astean plazaratu zituzten jaialdiaren abesti eta bideoklip ofizialak. Errotik orroa da kantaren izena eta Fetitxe taldeak sortu du, Liher taldeko Lide Hernandoren kolaborazioarekin. Orozkoko hainbat bizilagunek hartu dute parte bideokliparen grabaketan.
Argazki erakusketa
Larunbateko kontzertu maratoia ez da izango Orozkorockeko kideek antolatuko duten jarduera bakarra. Koldo Izagirre argazkilariaren erakusketa kokatu dute Orozkoko Museoan, igandera arte ikusgai egongo dena, ondorengo ordutegian: Ostiral eta larunbatean 10:00etatik 14:00etara eta 17:00etatik 19:00etara, eta igandean 10:00etatik 14:00etara.
Iragan abenduan aurkeztu zuten Orozkorock jaialdia eta izen bereko elkartea. “Rock&rolla komunitatean gozatu arazteko asmoz” sortu zuten elkartea, aurkezpenean azaldu zutenez. Horretarako antolatu dute jaialdia, baina “musikarekin erlazionatutako jarduera gehiago” egiteko asmoa dute etorkizunean.