Abian dago Orozkoko Lore-dekorazioaren Lehiaketaren lehen edizioa. Bi kategoria izango ditu Orozkoko Udalak antolatutako norgehiagokak: lehenengoan leku pribatuak (etxeko leihoak edo balkoiak) sartuko dira, eta establezimendu publikoak (ile-apaindegiak, dendak, taberna...), aldiz, bigarrenean.
Sariak berdinak izango dira bi modalitateetan: Lehen postua lortzen duenak 100 euro jasoko ditu, bigarrenak50 euro eta hirugarrenak 25 euro.
Izen-ematea
Lehiaketan parte hartzeko beharrezkoa izango da ekainaren 7a baino lehen izena ematea, Induma Informazio Bulegoan (946 339 945 telefonora deituta edo infoinduma@yahoo.es helbide elektronikora mezu bat bidalita).
Ekainaren 21an egingo da parte hartzaileen puntuaketa eta 23an banatuko dira sariak, erromerian.
Hitzaldia
Lehiaketaz gain, hitzaldia ere egingo da, barneko eta balkoietako loreei buruz. Udal liburutegian izango da zita ekainaren 12an, 17:00etan.
Orozkokoa ez da eskualdean egiten den mota horretako lehen lehiaketa. Urduñan urteak daramatzate hiria lorez apaintzeko lehiaketa egiten, zonaldea erakargarriagoa egiteko bizilagun zein bisitarientzat.