Iragan astean izan zen sari banaketa. Euskadiko ogirik onenak hautatu zituen epaimahaiak, horien artean zegoen Izakoena. "Aje emozionala igaro ostean, prest nago kontatzeko zeinen zoriontsu sentitzen naizen", kontatu du sare sozialetan Aida Iza Fuentesek. Horrez gain, finalera iritsitako ekoizle guztiak zoriondu ditu: Gasteizko Artepan, Black Bread Maker Berteiz, Mendiondo ogitegia eta Roberto Fernandez de Crosta. "Izugarri miresten ditudan profesionalak dira", erantsi du.
Ekimenaren harira, mota honetako ekimenen garrantzia azpimarratu du, "ogi onaren eta ongizatearen kultura sustatzen dutelako". Dena den, nabarmendu du horrelako ezer ez litzatekeela posible izango bere taldea gabe: "Aitak animoak eta baikortasuna eman dizkit beti. Baina, batez ere, amari eskertu behar diot sakrifizioaren, ahaleginaren, pasioaren eta pazientziaren esanahia. Amari eskaintzen diot saria, zure amets eta proiektuengatik borrokatzeagatik etsi gabe, beti ezaugarritzen zintuen bake horrekin". Familiako beste zenbait kide ere izan ditu gogoan: "Jose Migel osaba eta Marcelo aitona kasu, bere garaian honelako lanbide noble eta umilaren alde apustu egiteagatik, ogi artisaua izatea erabaki baitzuen".
Izaren arabera, guzti horien indarragatik iritsi da egun dagoen tokira. Aurrera begirako erronkez galdetuta, borrokan, ikasten eta ilusio askorekin jarraitzea espero du: "Oso indartsu nago. Gora zuek eta ogi osasuntsua!".