aiaraldea.eus

Batzordeen funtzionamendua aldatzea proposatu du EH Bilduk, “udal ireki eta parte-hartzailea” bultzatzeko

Erabiltzailearen aurpegia Erredakzioa   Politika  Orozko

Hiru neurri zehatz proposatu ditu koalizioak egoerari buelta emateko.

Batzordeen funtzionamendua aldatzea proposatu du EH Bilduk, “udal ireki eta parte-hartzailea” bultzatzeko
EH Bilduko zinegotziak, artxibo irudi batean. / Aiaraldea.eus | Ikusi handiago | Argazki originala

Orozkoko EH Bilduk proposamena tramitatu du udalean, tokiko erakundea “irekia eta parte hartzailea” izan dadin. “Herritarren parte-hartzea sustatzeko politiken beharra azpimarratu nahi dugu, izan ere, egungo batzorde informatiboetako eta Tokiko Gobernu Batzordeko funtzionamendua ez da parte-hartzailea”, azaldu du oposizioko taldeak. 

Hiru gabezi nagusi nabarmendu ditu koalizioak. Alde batetik, hitzorduak “ordu ez parte-hartzaileetan” egiten direla salatu dute. “Batzorde gehienak 8:00 eta 8:30ean hasten dira eta herritarrok oso aukera gutxi ditugu ordu hauetan udaletxera hurbiltzeko. Udala herritarron beharretara egokitu behar da, ez alderantziz”. Horrez gain, deialdiak modu egokian zabaltzen ez direla gaineratu dute EH Bilduko kideek: “Egun bat lehenago argitaratzen dira udal web-gunean eta aurreko egunean eskegitzen dira udaletxeko atean; deialdiak denboraz ez zabaltzeak herritarren parte-hartzean eragin zuzena duela jakinik”.

Horren ondorioz, parte hartzea txikia dela azpimarratu du talde politikoak: “zinegotzi eta teknikariez gain, ez da herritarrik hurbiltzen batzorde informatiboetara eta Tokiko Gobernu Batzordeetara”.

Gauzak hala, hiru neurri proposatu ditu koalizioak aipatutako arazoak konpontzeari begira:

  1. Batzordeak herritarrei egokitutako ordu parte-hartzaileetan egitea. Batzorde "irekiak" beranduago egitea proposatzen dugu; herritarroi parte-hartzeko aukerak eskainiz.
  2. Batzordeak egiteko egunak adostu eta hilabetero berdinak izatea. Udalbatzen kasuan bezala, batzordeak ere aurretik adostutako datetan egitea; herritarrentzako erreferenteak diren hitzorduak sortuz.
  3. Deialdiak behar bezala eta garaiz zabaltzea. Batzordeetako deialdiak herritarrei iristen zaiela ziurtatu eta lehenago zabaltzea.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa