BBK Aretoa gainezka egon zen larunbatean, Artzaintza Gorbeian. Milaka urteko lanbidearen iragana, orainaldia eta etorkizuna dokumentalaren emanaldia egin baitzuten. Jose Luis Urrutiak eta bere taldeak ekoiztuta, Aztarna elkarteak bultzatu du proiektua eta Aiaraldeko, Gorbeialdeko, Araba eta Bizkaiko hainbat elkartek eta erakundek lagundu dute diruz.
Dokumentalak begirada zabala proposatzen dio ikusleari; antzinako artzaintzan abiatzen da kontakizuna eta apurka-apurka egungo egoerara hurbiltzen da. Horrela, artzain beteranoen bizipen gogorrak jaso ez ezik, XXI. mendean bere ibilbidea abiatu duten abeltzain gazteen lekukotzak ere erakusten ditu.
Besteak beste, teknologia berrien eragina eta lehen sektorearen erronkak deskribatzen dituzte pantailan agertzen diren lagun guztiek, etorkizunera begira.
Bilbon egindako aurkezpenak filmaren hainbat protagonista elkartu zituen eta proiekzioa bukatu bezain laster, oholtzara igo ziren guztiak. Orozkoko belaunaldi anitzeko artzain ugari elkartu ziren agertokian.