"Nagusilagun" programa aurkeztu du udalak 65 gorakoen alderdi fisiko, kognitibo eta sozialak lantzeko

Kultur etxean egingo dituzte saioak. / Aiaraldea.eus

Hiru hilabeteko iraupena izango du programak eta ordu eta erdiko saioak egingo dira astero. Tarte horretan psikomotrizitatea, kalkulu mentala, memoria eta pertsonen arteko harremanak hobetzeko ariketak egingo dira.

Orozkoko Udalak "Nagusilagun" programa aurkeztu du, 65 urtetik gora dituzten pertsonen artean ekintza fisikoak, kognitiboak eta sozialak bultzatzeko helburuarekin. Hiru hilabetetan zehar garatuko da programa, eta ordu eta erdiko saioak egingo dira astero Kultur Etxean. Hara joan ahal izateko taxi zerbitzua eskainiko dute udaletik.

Otsailaren 14ra arte eman ahalko dute izena parte hartu nahi duten pertsonek udaleko gizarte zerbitzuetan, 8:00etatik 15:00etara; edo Induma informazio bulegoan, astelehen eta asteazkenetan 18:30etatik 20:30etara.

Programaren helburua “mendekotasun egoerak prebenitzea” izango da, baita “autonomia pertsonala eta integrazio komunitarioa sustatzea ere”, tokiko erakundeak azaldu duenez. Alderdi fisikoan “gerontogimnasia” eta “psikomotrizitatea” lantzeko ariketak egingo dira; eta alde kognitiboan kalkulua eta memoria indartuko dira, besteak beste. Alderdi sozialari dagokionez, pertsonen arteko harremanak jorratuko dira.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide