aiaraldea.eus

Zaloa auzunean zentratuko da "Ilargi guztiak" filmaren grabaketa

Erabiltzailearen aurpegia Aitor Aspuru Saez   Kultura  Orozko

Pelikula grabatzen ari den taldeak nabarmendu du nahiago dutela publikoa ez bertaratzea, errodajean zaratak ekiditeko.

Zaloa auzunean zentratuko da "Ilargi guztiak" filmaren grabaketa
"Ilargi guztiak" grabatzen ari dira Orozkon. / A. E. | Ikusi handiago | Argazki originala
Orozkoko auzoak Ilargi guztiak filmaren protagonistak izango dira. Izan ere, astelehenean Ugalden egon eta gero, gaur Urigoitira joko dute grabatzera, eta Zaloara gero.

Berez, Zaloan egongo dira asteazkenetik ostiralera arte, dena ondo bidean. Aritz Elizegik aipatu du eguraldiak edo zailtasunek atzerapenak eragin ditzaketela, baina momentuz hori da euren asmoa.

Pelikula Karlistaldien eta Guda Zibilaren urteetan girotuta egongo da eta horregatik hautatu dituzte Orozkoko nekazal auzuneak.

Zaloan elizaren barruan eta inguruetan arituko dira lanean; Aritz Elizegi kokapen arduradunak azaldu du noizean behin bost minutuko errepide mozketak egin beharko dituztela: "Istorioa XIX. eta XX. mendearen hasieran girotua dagoenez, ezin da entzun autoen motorren soinua".

Tarte horiek kenduta, bizilagunek ez dute arazorik izango auzoetara sartzeko eta irtetzeko. Edonola ere, Elizegik azpimarratu du nahiago dutela jendea ez bertaratzea grabaketara. "Kontu handiz ziurtatu behar dugu inor ez agertzea planoan edo zaratarik ez egotea; nahiko astunak izan behar gara", aitortu du kokapen arduradunak.

Horrez gain, Elizegik esan du euren ibilgailuak Zaloan bertan egongo direla eta, gehiago agertuko balira, anabasa sortuko litzatekeela.

Azkenik, errodajeko kideak gehitu du eguraldiaren ondorioz zuhaitzak erori daitezkeela bidean eta arriskutsua izan daitekeela auto gehiegi ibiltzea.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa