Hizkera inklusiboa gaztelaniaz erabiltzen ikasteko doako online ikastaroa egingo da Orozkon. 20 orduko kurtsoa izango da, maiatzaren 4tik 24ra arte iraungo du, eta apirilaren 30era arte eman ahalko da izena. Horretarako, mezua bidali beharko da infoinduma@yahoo.es helbidera norberaren datuekin: Izen-abizenak, telefonoa eta e-maila. Kontuan hartu beharra dago plazak mugatuak izango direla eta partaideen zerrenda izen-emate dataren arabera egingo dela, Orozkon erroldatuta daudenei lehentasuna emanda.
Online izanik, partaideak edozein momentutan sartu ahalko dira ikasgelan, lan-erritmo askatasuna ziurtatuta, udalak ohar batean adierazi duenez. Era berean, eztabaida eta hausnarketa foroak bultzatuko dira, “parte-hartzaileen arteko iritzi-trukea, hausnarketa eta jardunbide egokien azalpena errazteko”.
Ikastaroa sei unitatetan banatuko da, bakoitzak genero perspektibatik hainbat gai jorratuta. Tutore batek zuzenduko du eta dokumentazio bibliografikoa beste eduki mota batzuekin konbinatuko da, ebaluaziorako hainbat ariketa proposatuz.
Hemen eskuratu daiteke ikastaroari buruzko informazio guztia.