Kultur Barikuak ekimenarekin abiatu zuen urtea Orozkoko Udalak. Neguan zenbait solasaldi eta kontzertu egin dituzte, baina udaberriko egitaraua bete-betean oztopatu du koronabirusak. Hala, tarte batez alboratu behar izan dituzte jarduerak, Zuriñe Urkijo Arbaiza kultura zinegotziak Aiaraldea komunikabideari azaldu dionez: "Kultur Barikuen formatua aldatu behar izan dugu. Bertsozale Elkartearen bidez martxoko saioa moldatzeko proposamena egin ziguten".
Villabonan grabatu dute bertso saioa eta ostiralean emitituko dute 19:30ean, www.bertsoa.eus atarian. Begoñe Olabarria Astobiza orozkoarra izango da gai-jartzailea eta Oihana Iguaran, Onintza Enbeita zein Alaia Martin bertsolariak arituko dira kantuan. Martxoaren 13an Orozkoko Donibane aretoan zuten lotua hitzordua eta Lankuren bidez eskainiko dute ikuskizuna: "Orozkoko saioa Euskal Herri osoan ikusiko da".
Hurrengo Kultur barikuak
"Fase eta neurrien arabera egokituko ditugu aforoa eta beharrezko neurriak", zehaztu du Urkijo Arbaziak. Perkusio kontzertu didaktikoa izango da ekaineko ekintza. Tailerraren zehaztasunak hilabete hasieran jakinaraziko dituzte, aurreratu duenez. Gobernu taldeak, kulturgintzari bultzada eman nahi dio, zinegotziak erantsi duenez, "ez dutelako batere egoera erraza orain, ezta aurrerantzean ere. Gure partetik ahal duguna egingo dugu".