Txapeldunorde izendapenarekin itzuli da Gentzane Aldai pilotari orozkoarra Aiaraldera. Atzo izan zen finala Iruneko frontoian, 351 lagunen aurrean.
Emakume Master Cup-eko antolatzaileek azaldu dutenez, kanpoan jendea sartu ezinik geratu zen, "eta ikuskizun polit batekin bete zen normalean gizonezkoei erreserbatutako telebista parrillaren zatia". Horregatik adierazi dute emakumeen pilota izan dela garaile Urantzu pilotalekuan, "pasatakoak pasata giro bikaina bizi ahal izan delako".
Goxua eta pilota mistoko finalak izan ziren atzo norgehiagoka nagusi, eta bigarren kategorian lehiatu zen Gentzane Aldai, Olatz Arrizabala gernikarrarekin batera. Leire Garai eta Olatz Ruiz de Larramendi izan zituzten aurkari.
Lehenbiziko urtea da pilota mistoan jokatu duena Aldaik, baita Arrizabalagak ere. Hargatik, pozik egoteko motibo asko dituzte, Emakume Master Cupekoek aitortu dutenez, "txapelketa bikaina osatu dute eta".
0-9 galtzen hasi ziren Aldai eta Arrizabalaga, baina partida 14-18 arte estutzea lortu zuten. Alabaina, 14-22 izan zen emaitza, eta ondorioz, bigarren postuarekin bukatu dute Emakume Master Cup txapelketa. Guztira 467 pilotakada izan zituen norgehiagokak, eta 54 minutu eta 23 segundo iraun zituen.
Goxua kategorian Maite Ruiz de Larramendi-Iera Agirre bikoteak jantzi zuen txapela, Nagore eta Leire Galeano ahizpak 22-7 irabazita.
Argazkiak: Ixone Collado