"Txapela gabeko irabazlea naiz bidelagun dudan jendeagatik, hori da niretzat inportanteena". Gentzane Aldai orozkoarraren hitzak dira, Emakume Master Cup txapelketako finalaren biharamunean. Igandean izan zen lehiaketako finala. Olatz Arrizabalaga gernikarra izan zuen bikote, baina ezin izan zituzten Leire Garai eta Olatz Ruiz de Larramendi garaitu. Hain zuzen, 14-22 gailendu zen bikote aurkaria, eta ondorioz, eurek jantzi zuten Emakume Master Cup-eko txapela.
Irungo Urantzu pilotalekuan izan ziren ekainaren 28an "goxua" eta "pilota mistoko" finalak, 351 ikuslerekin frontoia lepo zela. Lehenbizikoz aritu da orozkoarra pilota mistoan lehiatzen. Baita lehiaketan bikote izan duen Olatz Arrizabalaga ere. "Finalaren ostean zapore gazi-gozoarekin geratu gara, baina aurretik egindako lana oso ona izan da", adierazi dio Aiaraldea Komunikabideari orozkoarrak. Espektatibarik gabe heldu ziren finalera, "eta benetan urte berezia izan da".
"Espektatibarik gabe lortu genuen finalerako txartela, eta benetan urte berezia izan da"
Partida gogorra izan zen Aldairentzat: "Olatz Arrizabalagak jokatzeko zegoela erakutsi zuen, nahiz eta zortea kontra izan. Nik, aldiz, ez nuen behar bezalako partida egin, eta atzeko koadroetan askoz gehiago izan zen Ruiz de Larramendi". Meriturik ez die kendu aurkariei, hala ere: "Partida oso serioa egin zuten hasieratik, guk espero ez genituen akatsak egitera behartuz, eta horri esker merezitako txapela lortu zuten". Joko pertsonalarekiko presioak gailendu izanaren pena du, baina familia eta lagunen babesaren poza: "Txapelik gabeko irabazlea sentitu nintzen, eta hortaz, gutxigatik bada ere, gainditutzat ematen dut finala".
0-9 galtzen hasi arren, tartea 14-18 tantora estutzea lortu zuten, baina 14-22 bukatu zen norgehiagoka. "Berrogeialdian zehar lan fisiko asko egiteko aukera izan dugu, konforme gaude egindakoarekin, konfinamenduaren hasieran baino indartsuago atera gara". Hala ere, frontoietatik kanpo horrenbeste aste emateak eragina izan du, Aldairen esanetan: "Lehen entrenamenduetan nahiko sentsazio kaskarrak izan nituen. Pixkanaka erritmoa hartzen joan gara, eta azken entrenamenduak primerakoak izan dira, finalean igarri ez arren".
"Gauza asko daude hobetzeko, baina lanean jarraitzeko gogotsu nago. Kantxan gertatutakoa hor geratzen da"
Aurrera begira, "finalarekin hartutako mina kentzea" izango du helburu orozkoarrak, "gauza asko daude hobetzeko, baina gogotsu nago lanean jarraitzeko". Indar adina esker ditu, ordea, aurtengo txapelketa borobiltzeko: "Kantxan gertatutakoa hor geratzen da. Familia eta lagunei euren babes, maitasun eta beroagatik eskerrak eman nahi dizkiet, egunerokotasunean eurak alboan sentitzeak borrokatzeko indarra ematen baitit. Horrez gain, txapelketako bikote eta lagun izan dudan Olatz Arrizabalaga eta gure entrenatzaile Unai Arrizabalaga aipatu nahi ditut: pilotari ikaragarriak dira, baina pertsona hobeak. Benetan zorionekoa sentitzen naiz".