Atzo Eusko Jaurlaritzak publiko egin zuen "Saia" baimenak 2012tik ematen zizkion eskubideei uko egingo diola. Zehazki, SHESA (Sociedad de Hidrocarburos de Euskadi) enpresa publiko-pribatuak bertan behera utziko du gas eta hidrokarburoen bilaketa Orozkon.
Agindua Arantxa Tapia Garapen Ekonomiko eta Azpiegituren Sailburuak eman zuen, urtebeteko luzapena urtarrilean amaitu ostean.
SAIA baimena Aiaraldean
Egitasmoa oso polemikoa izan da Aiaraldean, bereziki 2013an. Urte horretan proba sismikoak egin zituen SHESAk Orozkon, eta mota ugariko oposizioa topatu zuen. Alde batetik, jabeek eta Orozkoko Udalak ez zuten erraztasunik eman ezjabetzak gauzatzeko, eta 6 kilometroko lurraldean ezin izan zituzten lanak egin.
Horri gehitu behar zaio protestak eta sabotajeak ere gertatu zirela ibilbide osoan. Aiaraldean Orozkotik Luiaondora izan ziren proba sismikoak:
Kanpaina sismikoaren ostean Frackingaren aurkako jarduerak ez zuen etenik izan bailaran, harik eta hidrokarburoak eskuratzeko teknika hori debekatzen zuen legea Eusko Legebiltzarrean onartu arte.
Borroka ez da bukatu
"Fracking Ez Aiaraldea" plataformak pozik hartu du albistea: "Berri ona da, baina ezin da ahaztu Saia baimenak ahalbidetzen duela beste leku batzuetan putzuak egitea eta Araban Subijanako egitasmoa dago oraindik indarrean. Eusko Jaurlaritzak dio ez dutela Frackinga erabiliko, baina zer zentzu dauka lan horiek egitea ez bada gasa ateratzeko teknika hori baliatuta? Ura kutsatzeko arrisku handia ez ezik, aldaketa klimatikoa ere arrazoi indartsua da horrelako proiektuak gelditzeko".