Ehiza hondakinak biltzeko polietilenozko edukiontziak jarriko ditu Bizkaiko Foru Aldundiak hainbat herritan. Orozko da herri horietako bat. “
Osasun publikoko eta animalien osasuneko arazoak saihestea” da ekimenaren helburua, erakundeak zehaztu duenez. “ Animalien erraiak eta hondakinak bertan behera uzteak osasun publikoko eta animalien osasuneko arazoak eragin ditzake (...) Tratamendu Mekaniko Biologikorako instalazioan (TMB) Q sukarraren agerraldiak sortutakoak bezalakoak”, azaldu du Elena Unzuetak, Iraunkortasuna eta Ingurune Naturala Zaintzeko diputatuak:
Abeltzaintzako ustiategietako animalien gorpuak biltzeaz arduratzen den kamioa arduratuko da ehiza hondakinak ere jasotzeaz. “Ehiztariak Aldundiaren harremanetarako telefono baten bidez jakinarazi beharko du animalia-hondakinak utzi dituela edukiontzietako batean, non dauden zehaztuta, eta bilketa egiten duen kamioia egun berean igaroko da edo, beranduenez, hurrengo egun baliodunean, hondakin horiek kentzeko”. Txartel magnetikoak baliatu beharko dira edukiontziak irekitzeko.
“Etorkizunean, ehiza-hondakinetarako edukiontziek abeltzaintzako ustiategietan autokontsumorako arkumeak hiltzean sortutako animalia-hondakinak kudeatzeko ere balio lezakete, gai hori erregulatzen bada”, nabarmendu du Unzuetak, eta ekimenak “basoko faunaren zainketarako” balioko duela gehitu du, “eta baita animalien osasunerako eta osasun publikorako interesgarriak diren gaixotasunen jarraipena egiteko ere”.