Olgetan elkarteko kideek oharra plazaratu dute Orozko Kup txapelketa atzeratu dutela jakinarazteko. Iaz egin zuten Emakume Pilotarien Gomazko Paleta Txapelketa horren lehen edizioa, hiru helburu nagusirekin: “emakume pilotarientzako mailako txapelketa antolatzea, hainbat herrialdeetako emakume pilotarien arteko elkartze eta erlazio puntu berri bat sendotzea eta emakumeen euskal paletari bere lekua duela erakustea”.
Azken hilabeteetan lan handia egin dutela nabarmendu dute elkarteko kideek, txapelketaren bigarren ediziora “Elite mailako Euskal Herriko emakume palistarik onenak” eramateko eta babesleak bilatzeko, besteak beste. COVID-19aren aurkako “protokolo zorrotz eta serioa” lantzen ere egon dira, udalarekin eta herriko kiroldegiko arduradunekin.
Hala ere, norgehiagoka atzeratzea erabaki dute azkenean, pandemiaren bilakaera eta Eusko Jaurlaritzak azken egunetan hartutako neurriak direla eta. Ekimena gauzatzeko beste data bat bilatzen hasiko direla ziurtatu dute, “herrialde bakoitzeko txapelketak martxan jarri bezain pronto”.
Hala ere, “barkamenak” eskatu nahi izan dizkiete Emakume Pilotarien Elkarteari, udalari eta txapelketan konfiantza jarri duten babesleei. “Egoera hobetu bezain pronto, txapelketa martxan jarriko dugula zin eginez agurtzen zaituztegu”.