Orozkoko Film Laburren Lehiaketak badu data. Abenduaren 4an egingo da ikus-entzunezkoak protagonista dituen jaialdi horren 5. edizioa. Aurreko urteetan bezala, bi ekimen egongo dira.
Alde batetik, ohiko lehiaketa egongo da. Abenduaren 2ra arte egongo da lanak entregatzeko epea. Ondorengo helbidera bidali beharko dira bideoak: supelaur.kt@gmail.com. Baldintza bakarra bete beharko da: lanak euskarazkoak izatea edo euskarazko azpi-idatziak izatea.
Abenduaren 4an ebatziko da lehiaketako irabazlea, eta 250 euro jasoko ditu sari moduan.
Rallya
Beste aldetik, ikus-entzunezko rallya egingo da abenduko lehen ostiralean. 9:00etatik 18:00etara egongo da ekimenean izena emateko tartea, Supelaurren egoitzan. Parte hartzaileek 18:00ak arte izango dute ikus-entzunezkoa grabatzeko denbora.
Lanek 3 minutu iraun ahalko dute gehienez, eta MP4 formatuan aurkeztu beharko dira. Hizkuntzari dagokionez, lehiaketako irizpide berdinak mantenduko dira: lanak euskaraz grabatuak egon beharko dira edo, bestela, euskarazko azpi-idatziak izan beharko dituzte, gutxienez.
Rallyko pelikula irabazlearen egileek 250 euroko saria jasoko dute. Horrez gain, beste horrenbeste diru jasoko du publikoaren partetik bozka gehien jasotzen dituen lanak.
19:00etan egingo dira pelikula guztien proiekzioa eta sarien banaketa, Donibane Aretoan.
