ARGAZKI KRONIKA

"Errimak oinetan" eta bertsoak dantzan

"Errimak oinetan" ikuskizuna eskaini zuten atzo Orozkoko Donibane Aretoan. Haatik dantza konpainiak bertso txapelketetako zein jaialdietako eszenak kontatu zituen dantza bidez.

Imajinatzen duzue bertso saio bat zuzenean inor kantuan egon gabe? Bost dantzari (Haatik dantza konpainia) eta gai-jartzaile bat (Unai Elizasu) taularatu ziren atzokoan Orozkoko Donibane Aretoan, eta kantuz ez ezik, dantzaz erakutsi zieten ikus-entzuleei bertsoaren mamia.

 "Errimak oinetan" du izena emanaldiak, eta ordubete inguruko iraupena du. Hasiera-hasieratik bertsolaritzaren historian esanguratsuak izandako eszenak eta gertaerak aurkeztu zituzten, baina dantzan. Hain zuzen, Unai Elizasu gai-jartzailearen esanetara jardun zuten neurri, doinu eta gai ezberdinekin Haatik dantza konpainiako kideek.

Hasteko, "kartzelako lana" jarri zien gai-jartzaileak, tabernan zuritoa eskatu duenaren azalean osatzeko ariketa. Bost dantzariek helduleku ezberdinak topatu zizkioten gaiari, eta bertso jarrien bidez -aurrez idatzi eta grabatutakoak- istorio anitzak kontatu zituzten: kontraesanak desio dituen gaztearena, umedun dagoenarena, alkoholikoarena...

Uztapiderekin buruz-burukoa jokatzen, txapela lortzeko lehiaren azken txanpan, jarri zuen une batean emakume dantzarietako bat. 1967. urtean, Xalbadorri egokitu zitzaion egoera hori, eta txistualdi luzeari egin behar izan zion aurre bertsolariak. 

Lazkao Txikik ispiluari abestutako aleak, kopla saioak... Denetariko historia eta filosofia markak utzi zituen emanaldiak; musika eta dantza estilo anitzak uztartuta. 

Koronabirusa dela medio aforoa mugatua izan arren, jende ugariren arreta erakarri zuen ikuskizunak. Amaieran, pozik zeuden denak, "ez genuen espero horrelako emanaldia izatea", zioten batzuek. Errimak, burutik oinetara eraman daitezkeenaren adierazle.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide