Nolako zura, halako ezpala. Hala dio esaera zaharrak, eta hori begizta liteke Fidel Largatxak eta Julian Olabarriak eginiko erakusketara bertaratuta. Largatxaren ikaslea da Olabarria, baina urte eta esperientzia andana daramatza tailagintzan. Gauzak hala, bien zenbait lan aukeratu dituzte Orozkoko Museoan erakusketa atontzeko.
Urtarrilaren 20an abiatu zuten dinamika, museoari ekarpena egiteko, Largatxak aitortu duenez. “Orozkon Museoa izanda, eta askotan hutsik egonda, ekarpen polit bat egin genezakeela iruditu zitzaigun”. Horrela atondu zuten erakusketa. Julian Olabarriak “egur klasikoan” tailatutako obrak eraman ditu, eta Fidel Largatxak “egur eskulturak” zein arkatz marrazkiak. “Orozkoko zenbait toki arkatz eta margoekin marrazteari ekin nion konfinamenduan, eta horietako batzuk ekarri ditut ere”, kontatu du.
Igandera arte egongo da pieza sorta ikusteko aukera: argizaiolak, Gernikako koadroaren egur erreplikak edota arkatzez marraztutako Orozkoko tokiak
“Alkate onena” ume bat altzoan irudikatu du sortzaileak, besteak beste. Marrazkien artean, berriz, Atxulaurko begia, Kurtzeganeko menhirra edota herriko baserriak pilatu ditu. Hego haizea bezalako kontzeptu abstraktoak ere landu dituzte, ordea. Baserriko bizimoduari lotutako lanak dira, oro har. Esaterako, zuraren baitan tailatutako “txarriboda” irudikatu dute obretako batean. “Tresna gutxirekin gauza politak egin daitezke”, azpimarratu du artisauak. Arteak mugarik ez duenaren seinale.