Laboral Kutxa Emakume Master Cup txapelketan parte hartuko du bigarrenez Gentzane Aldai Calonge pilotari orozkoarrak. Iaz finalera heldu zen, baina bigarren postuarekin etxeratu zen Iruneko norgehiagokatik.
Martxoaren 7an, lehen kanporaketa
Martxoaren 7an izango du lehenbiziko partida Aldaik. Asteasun jokatuko du final laurdena, Irantzu Etxebeste eta Olatz Ruiz de Larramendiren aurka. Irabaztekotan, Irunen lehiatuko litzateke martxoaren 21ean, finalerdietan, hain zuzen.
Amaia Alday oso maila onean ikusten duela eta, indartsu azaldu da orozkoarra: "Ni bizkarzain ona izaten saiatuko naiz. Azkenaldiko bolada txarrarekin bukatzea, lehiakor sentitzea eta, ahal bada, finalean sartzea izango da txapelketako nire aurtengo helburua".
8 bikote, bi multzotan
COVID-19ak eragindako pandemia dela-eta, txapelketa irekia antolatzeko zailtasunak izan dituzte, pilotariaren esanetan: "Arazoak daude olgetako eta entrenatzeko frontoiekin". Hala ere, ekimenarekin jarraitzea erabaki dute, eta 16 kirolari ariko dira nor baino nor lehian. Hala, 8 bikotek osatuko dituzte bi multzoak.
"Kanporaketa sisteman jokatuko dira partida guztiak. Lehen partidak final laurdenak izango dira", zehaztu du orozkoarrak. Iazko txapelketa Olatz Arrizabalagarekin jokatu zuen. "Kasu honetan aldaketa ez da hain handia izango, Amaia Aldayrekin batera ere entrenaten dudalako, eta aspalditik oso lagunak garelako", erantsi du, "alde horretatik lasai nago; nirea ahal den ondoen egitea da nire helburu nagusia, jartzen didaten bikotea bata edo bestea izan".
Iaz, finalaren atarian geratu zen orozkoarra Binakako txapelketan, Olatz Arrizabalagarekin finalerdietarako txartela eskuratu eta gero. Lau t'erdiko lehiaketa, berriz, bertan behera geratu zen, koronabirusa dela-eta.