Bizkaiko parapente zale gehien batzen dituen taldea da Iparair, eta Bizkaiko Parapente Txapelketa antolatzeko lanetan ari da. Orozkon jokatuko da kirol proba ekainaren 12 eta 13an. Parte hartzeko nahikoa izango da Open mailan federatuta egotearekin, edozein lurraldetan. Bizkaian federatutako kirolariek, gainera, lurralde mailako txapelketan ere neurtuko dira.
Derrigorrezkoa izango da lehiatzeko maila egokia izatea, eta maila hori agiri-ofizial bidez akreditatzea.
Parte-hartzaileak uneoro egongo dira GPS bidez lokalizatuta, eta antolakuntzako kideekin irrati bidezko harreman zuzena izango dute uneoro.
Txapelketak Cross Country proben estiloa jarraituko du, hau da: parte-hartzaileek lasterketa bat egin behar dute aurrez baliza birtual batzuen bitartez markatutako ibilbide batean, eta pilotuek ordena jakin batean gurutzatu beharko dituzte baliza horiek.
Ibilbidea azkarren betetzen duenak irabazten du norgehiagoka. Parte-hartzaile bakar batek ere ez badu zirkuitua bere osotasunean betetzen, zati handiena egin duenak lortuko du garaipena.
Ekainaren 10ean ziurtatuko dute proba aurreikusitako egunetan egingo den edo ez, eguraldiaren arabera
Baldintza meteorologikoak
Parapentea baldintza meteorologikoen menpe dagoen kirola da: haizearen indarra, norabidea, lainoa... Proba aurrera eraman ahal izateko baldintza zehatz batzuk bete behar dira. Antolatzaileek ez dute data atzeratzea baztertu eguraldi egokiagoaren esperoan. Horregatik, ekainaren 10ean -osteguna- iragarriko dute Bizkaiko Txapelketa aurreikusitako egunetan egin ahalko den edo ez.
Era berean, parte-hartzaileek osatu beharreko ibilbidea baldintzatzen du klimak. Horregatik da ezinezkoa zirkuituaren nondik norakoak aurretiaz zehaztea.
Orozkotik Orozkora
Bizkaiko Parapente Txapelketak Orozko izango du abiapuntu eta Orozkon egongo da kokatuta helmuga. Aireratzea Santa Marinatik egingo da. Lurreratzea, aldiz, Orozkoko leku ofizialean, Iparair taldeak lagatutako landa batean.
Parapentea ohiko kirola da Santa Marinan. Auzoko jaien testuinguruan, hainbat aldiz antolatu dira hegaldiak: