Larunbata garrantzitsua izan zen Orozkoko Olgetan klubarentzat. Hala adierazi zuen elkarteak sare sozialetan. Izan ere, nesken gomazko paleta txapelketako partidak jokatu ziren herrian. Hain zuzen, Bizkaiko kluben arteko txapelketaren eta nesken gomazko paleta txapelketaren finalaren lekuko izan zen herria.
Emaitzei dagokienez, norgehiagoketan honakoak gailendu ziren: hirugarren mailan Alaitasuna Bakiotarrak taldea (30-12 irabazita Alaitasuna), bigarren mailan Gatikako Aterpe taldea (Lea Artibai 24-30 garaituta), eta lehen mailan Orozkoko Olgetan kluba (Udane Iturbe eta Ane Aldamak Olatz Zulaika eta Nerea Isusi izan zituzten aurkari; eta 27-30 irabazi zituzten).
Orozkoko 4 pala jokalari finalean
Lehen mailako final handian Orozkoko bi bikotek hartu zuten parte. Batetik, Udane Iturbe zelairatu zen Ane Aldamarekin kolore urdinarekin; eta, bestetik, Nerea Isusi eta Olatz Zulaikak kolore gorriz defendatu zuten beraien txapeldun izateko hautagaitza. "Zorionak emaitza horretara heltzeko bidean egon diren lantaldeei, bai izandako aurreko entrenatzaile guztiei eta baita gaur egun dagoen lantalde bikainari, Natxo Isusiren gidaritzapean", azpimarratu du kirol elkarteak.
Txapela, azkenean, Iturbe-Aldama bikoteak jantzi zuen, 30-27 irabazi baitzuten Isusi-Zulaikaren aurka. Dena den, klubarentzat izan zen garaipena, lau ordezkariak Aiaraldeko taldekoak ziren eta. Andoni Olabarriaren hitzetan, partida "oso polita eta berdindua" izan zen bukaera arte, "eta beste bi finalak ere luzeak eta lehiatuak izan ziren" .
Finala zuzenean emititu zuen Facebooken Orozkoko eragileak:
Argazkiak: Olgetan