Interes Publiko Goreneko Proiektuen figura jasotzearen aurkako mozioa onartu zuen Orozkoko Udalak asteartean eginiko Udal Osoko Bilkuran.
Iragan astean onartu zuen Eusko Legebiltzarrak Ingurumen Administrazioaren Lege berria, EAJren eta PSE-EEren botoekin. Opozisioko osoa lerrokatu zen lege horren aurka, Eusko Jaurlaritzari eskumena ematen diolako proiektu bat “interes orokorrekoa” dela ebazteko eta, modu horretan, herri batean udalaren baimenik gabe ezarri ahal izateko. ‘Tapia legea’ izenarekin ere egin da ezagun proiektua, Arantza Tapia sailburuak sustatu duelako.
EH Bilduk aurkeztu zuen mozioa plenoan, eta Adiek ere bozkatu zuen proposamenaren alde. EAJ, aldiz, aurka lerrokatu zen. Mozioaren arabera, “toki demokrazia” urratzen du Legebiltzarrean onartutako legean jasotzen den Interes Publiko Goreneko Proiektuen figurak. Gauzak hala, lege horren aurka pozisionatzeko deia luzatu dio udalak EUDELi, “eta dagozkion kudeaketa guztiak egin ditzala Lurralde Antolamenduari buruzko Legea modu horretan alda ez dadin”. Eusko Legebiltzarrera ere bidaliko dute Orozkon onartutako testua.