Bilboko Gizarte-Arloko bigarren Epaitegiak gaur jakinarazi du Galletas Artiach SAU enpresa zigortu duela greba eskubidea urratzeagatik. Hain zuzen, konpainiak 2.080 euro ordaindu beharko dizkio salaketa jarri zuten sindikatu bakoitzari; ESK, LAB eta ELA, zehazki.
Horrez gain, 50 euro eman beharko dizkie 20 langileri, zeinak azaroaren 22an, 23an eta 24an bere lanpostuan egon behar izan baitziren, protestetara batu ordez.
Abusuzko gutxiengo zerbitzuak
Azaroan ELA, LAB eta ESK sindikatuek 4 orduko lanuzteak deitu zituzten lan hitzarmen duina eskuratzeko Artiachen. 2020an iraungi zen azken lan hitzarmena eta negoziazioek ez dute aurrera egin ia bi urtetan.
Mobilizazio horren aurrean, enpresak bilera egin zuen azaroaren 18an eta erakunde grebalariei (UGT eta Cosme Ibarrola Ganzabalen hautagaitza independentea ez dira batu grebara) adierazi zien txanda bakoitzeko labeko bi langile beharrezkoak zirela ekoizpenaren bi lerrotan eta behargin bana lerro bakarrean.
Zuzendaritzaren aburuz, langile gutxiago egoteak labeak itzaltzea ekarriko zuen eta horrek lanuztea bera baino kalte gehiago eragingo zuen, labe bakoitzak ordu eta erdi edo bi ordu behar baititu pizteko.
Greba eskubidearen urraketa
Monica Gonzalez epaileak azaldu du ekoizpena gelditzea dela beharginen tresna legala negoziazio prozesu batean. Hortaz, ez zegoen justifikatuta enpresaren aldetik gutxiengo zerbitzu horiek ezartzea. Hain zuzen, epaileak ez ditu aintzat hartu enpresako lekukoek esandakoa abenduaren 17an izandako epaiketan. Egun horretan Artiachek deitutako lekukoek argudiatu zuten gutxiengo zerbitzu horiek segurtasun arrazoiengatik prestatu zirela. Epaileak, ordea, ez ditu sinisgarritzat hartu enpresaren aldeko deklarazioak, bilera aktan ez baitago aipamen bat bera ere horri.
Edonola ere, enpresak helegitea jartzeko eskubidea dauka oraindik.