Urrats bat gehiago emango dute Madres Mercedariaseko langileek euren lan baldintzen aldeko borrokan. Bost eguneko greba egingo dute Orozkoko Ibarra auzoko zentro horretako beharginek. Zehazki, urtarrilaren 28an eta otsailaren 1, 4, 9 eta 11n egingo dituzte lanuzteak, LAB eta ESK-k deituta. Bi sindikatu horiek osatzen dute enpresa batzordea, ordezkari bi eta batekin, hurrenez hurren.
Bi sindikatuek salatu dute Aliados fundazioak (zentroaren egungo kudeatzaileak) “murrizketa larriak” ezarri dituela, langileekin zuen hitzarmena aplikatzeari utziz. “Lanaldia handitzea, jaiegun gehiagotan lan egitea eta KPIaren araberako soldata igoera kentzea eragin dute murrizketa horiek”, zehaztu dute langileen ordezkariek, “delegatuek enpresari eskatu diote lan zentroko datu ekonomikoak ematea eta elkarrizketarako bideak irekitzea, baina zuzendaritzak uko egin dio horri, murrizketak aldebakartasunez inposatuta”. Aliados Fundazioaren eta Madres Mercedarias kongregazio erlijiosoaren “gardentasun eza” ere nabarmendu dute, kontuan hartuta “zerbitzuaren ardura Bizkaiko Foru Aldundiarena” dela.
Gauzak hala, Sergio Murillo (Aldundiko Ekintza Sozialetako diputatua) jarri dute egoeraren erantzule nagusi gisa.
Iaz ekin zioten Madres Mercedariaseko langileek lan baldintzen alde mobilizatzeari. Lanuzte eta mobilizazio ugari egin dituzte azken hilabeteetan, eta elkarlanean aritu dira, besteak beste, Artiacheko langileekin:
Eusko Jaurlaritzari eskaera greba eskubideari begira
Langileek “gizarte osoari” luzatu diote datozen egunetan egingo dituzten mobilizazioetara batzeko deia, eta eskaera zehatza helarazi diote Eusko Jaurlaritzari: langileen grebarako eskubidea errespetatzea, neurrigabeko gutxieneko zerbitzuak ezarri gabe.
Aniztasun funtzionala duten pertsonen zentroa da Ibarrakoa. Gaur egun 43 langile eta 80 erabiltzaile ditu.