Artiacheko langileek azaroaren 22tik daramate lanuzteak egiten, lan hitzarmen duinaren alde, eta dinamika berean jarraituko dute otsaila osoan, sare sozialetan jakinarazi dutenez.
Langileek gogorarazi dute lan hitzarmena 2018tik daramala berritu gabe, eta ohartarazi dute enpresak lan-baldintzak okertzeko baliatu nahi duela negoziazioa. Nabarmendu dutenez, aldi baterako langileek eta kontratatu berriek pairatuko lituzkete baldintza okerrenak.
Gainera, enpresak esan du, baldintza horiek sinatzen ez badira, ez dituela egingo "fabrikaren funtzionamendu egokirako eta modernizaziorako beharrezkoak diren inbertsioak", grebalariek oharrean salatu dutenez.
Hauek dira, beharginen arabera, enpresak ezarri nahi dituen baldintzetako batzuk:
- Soldata eskala bikoitza sortzea.
- Lanaldia handitzea.
- Lana eta familia bateragarri egitea are gehiago zailtzen duten neurriak.
Horren aurka, "lan baldintzak hobetzeko unea" dela uste dute langileek, horretarako "marjina ekonomikoa" dagoela argudiatuta: "Etekin ekonomikoak oso handiak dira, ia 20 milioi eurokoak azken hiru urteetan".
Elkarretaratzea Laudion
Egunero egiten dituzte mobilizazioak Artiacheko langileek. Bihar elkarretaratzea egingo dute 11:30etatik 12:30etara Laudioko Herriko plazan. Orozokora itzuliko dira jarraian, lantegi aurrean piketea egiteko: 13:00etatik 15:00etara bitartean. Ostiralean, aldiz, egun osoa igaroko dute fabrikaren aurrean.
Mobilizazioetara batzeko gonbita luzatu diete herritar guztiei, eta orain arte jasotako elkartasun keinuak eskertu dituzte. "Oso argi daukagu enpresa honek gure eskubideak ez lapurtzeko modu bakarra antolakuntza eta borroka direla, eta horretan jarraituko dugu gure helburua lortu arte".