Otsailaren 16an estreinatu zuen Ana Currak bere abesti berria: Aphrodita La Monarca. Parálisis Permanente talde madrildarraren kide ohiak Aiaraldeko gonbidatu berezia izan du bere bideoklipean: Kea Basaldua Bravo gaztea.
11 urteko orozkoarraren presentzia nahi zuen proiektuan Petra Muguruza zuzendariak, eta hala izan da. Izan ere, biek lan egin zuten aurretik Sirgueras film laburrean, eta horrela irabazi zuten Portugalete Zinema Express lehiaketaren lehen saria. Aphrodita La Monarca bideokliparen grabaketa abuztuan izan zen Sestaoko Txirbilenea gune okupatuan, eta ekoizpen lan handia izan du, bistakoa denez.
Ana Curra 'La Movida Madrileña' deituriko kultur mugimenduko kide ezaguna da. Lehenik eta behin, Alaska y los Pegamoides taldean jo zuen teklatua, eta gero gauza bera egin zuen Parálisis Permanente-n. Talde horren abesti erdiak sortu zituen Currak Eduardo Benaventerekin, bere bikote eta taldekidearekin. Ordea, 1983an banda desagertu zen, auto istripu batean Benavente hil zenean.
Ondoren hainbat proiektu izan ditu Currak: eta berez hau da, momentuz, azkenengoa. Afterpunk eta punk rock doinuetara itzuli da madrildarra.