Gorbeia Helmuga Turistikoak hainbat jarduera egingo ditu Aste Santuan ingurune horretan turismoa sustatzeko. Turismo erakunde horren ustez, “Euskadiko bihotz berdea" da Gorbeia, eta "berezko ezaugarriak ditu, eta aire zabaleko aisialdiaz gozatzeko beharrezko osagai guztiak ditu, ingurune pribilegiatu batean: natura, ondarea, tradizioa, gastronomia, historia, mitologia, zerbitzuak, abentura eta kirola”.
Gauzak hala, hainbat motatako ekintzak egingo dituzte, naturgunearen potentzialitate osoa ustiatzeko. Orozkoko Museoan, adibidez, doako bisita gidatuak eskainiko dituzte ostegunetik igandera bitartean. Egunero errepikatuko dute jarduera hori, goizeko eta arratsaldeko txandak tartekatuta:
- Apirilak 14, osteguna, 17:00etan.
- Apirilak 15, ostirala, 11:00etan.
- Apirilak 16, larunbata, 17:00etan.
- Apirilak 17, igandea, 11:00etan.
Horrez gain, “Street scape: Orozko Mariren eskutik” jarduera ere eskainiko dute. Ekintza horretaz gozatzeko Turismo bulegora jo beharko da apirilaren 14tik 17ra bitarteko edozein unetan, ondorengo ordutegian: 10:00etatik 14:00etara eta 16:00etatik 18:00etara. Ekimen hau ere doakoa izango da, baina komenigarria da tokia aurretik erreserbatzea, 946 122 695 telefonora deituta.