ARGAZKI KRONIKA

Orozkoko argazkilarien erakusketa ikusgai egongo da Museoan maiatzaren 1era arte

Orozko Museoan topatu daiteke erakusketa. / Aiaraldea.eus

Urtzi Verak gidatutako ikastaroaren parte-hartzaileen argazkiekin osatu dute erakusketa. Hainbat teknika erabili dituzte ikasleek, Orozkoko inguruetan bereziki.

Urtzi Verak argazkigintza ikastaroa eskaini zuen Orozkon azarotik martxora arte eta horren emaitzak jadanik ikus daitezke herriko museoan. Izan ere, erakusketa sortu dute beheko solairuko areto nagusian, orozkoarrek eurek egindako irudiekin.

Ekimenean sei herritar aritu dira eta maiatzaren 1era arte ikusi ahalko da irudi sorta. Verak azaldu du ikastaroan hainbat gai landu dituztela: "Teoriaz gain, argazki pilo ikusi genituen, norberak bere begia trebatzeko, eta argazkiak irakurtzen jakiteko. Horrez gain, ikasleek egindako irudiei buruz eztabaidatu dugu eta kritika onak zein txarrak egin ditugu".

Ikasleen artean Lourdes Intxaurraga eta Arantxa San Pedro daude. Intxaurragak adierazi du ikusi zuenean Vera zela irakaslea, zalantzarik gabe eman zuela izena: "Lehen banintzen argazkizalea, baina jakintza berezirik gabe, basoen eta erreken irudiak egiten nituen":

Arantxa San Pedrok, ordea, aurretik egina zuen beste ikastaro bat: "Baina oso oinarrizkoa zen, hau askoz aurreratuagoa izan da. Nik kalean topatzen dudana islatzea gogoko dut, baita Orozkoko auzuneak eta paisaiak, animaliak...".

Lourdes Intxaurragak bi argazki ditu erakusketan: "Familiari esan nion eta ez zuten asmatu zeintzuk ziren nireak. Uste zuten pagoen irudiak zirela, baina ez da horrela".

Hain zuzen, orozkoarra bereziki gustura geratu da bere etxetik hurbil dagoen erreka baten argazkiarekin: "Beti izan dut gogoko leku hori eta zeta efektua baliatu dut".

Arantxa San Pedrok, ordea, hiru argazki lagatu ditu. Horietako bi hegaztienak dira; eta hirugarrena, berak azpimarratzen duena, Urigoiti auzokoa. "Kurutzegaindik hartu nuen. Ikastaroan barneratutako teknika erabili dut, sei edo zazpi irudi bakarrean batzeko. Lehen argazkiak banatuta egiten nituen eta moztuta geratzen ziren. Teleobjetiboa baliatu nuen, urrutitik eginda baitago".

Argazki horiek guztiak ikusi nahi dituenak, aukera izango du, esan bezala, maiatzaren 1era arte.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide