Madres Mercedarias zentroko langileek 15. greba eguna egin dute gaur, salatzeko euren lan baldintzak okerrera egin dutela. Elkarretaratzeak egin dituzte Bilbon Foru Aldundiaren aurrean, Orozkoko Ibarra auzunean eta Zubiaur plazan ere.
Zentroko enpresa kudeatzailearen jarrera aldatu nahi dute lanuzteekin: "Fundacion Aliados enpresak eta Madres Mercedarias Erlijio Kongregazioak negoziatzeko borondate ezari eusten eta murrizketei eusten dieten bitartean, murrizketa horiek justifikatzen dituzten datu ekonomikoak ezkutatzen jarraitzen dute. Guk argi daukagu nora joan den gure dirua: Fundacion Aliados por la Integracion-en poltsikoetara".
Dena den, gaur bereziki kritikatu nahi izan dute Bizkaiko Foru Aldundiaren jokaera, beharginen ustez, ez baita inplikatzen ari lan gatazkan. "Bizkaiko Foru Aldundiak, Sergio Murillo buru duela, egoera hau babesten du. Erabiltzaileak haien lehentasuna direla esaten duten bitartean, enpresa pribatuei saltzen diete pertsona hauen zaintza, eta enpresa hauek poltsikoak bete besterik ez dute egiten", adierazi dute ESK eta LAB sindikatuek ohar batean.
Zentzu horretan, gògoratu dute atzo Bizkaiko Batzar Nagusietan eztabaidatu zela Madres Mercedariaseko lan gatazka: "EH Bilduren eta Elkarrekin Podemos-en ekimenez, Gizarte Ekintzako diputatuak, Sergio Murillok, Ibarrako Madres Mercedarias gure lantokiari buruzko galdera banari erantzun behar izan zien. Sergio Murillok, beste behin ere, lantoki honen ezohiko kudeaketa onartu arren, beste aldera begiratzen du eta ez du bere gain hartzen titulartasun publikoa duen zerbitzu baten kudeatzaile gisa duen erantzukizuna. Sergio Murillok ez du azalpenik eman nahi izan elikagaien bankua erabiltzaileak elikatzeko erabiltzeagatik jarri dugun salaketari buruz, ezta Aldundiak zerbitzu publiko hori egiteko enpresari ematen dion dirua nora doan jakiteko zalantza arrazoizkoei buruz ere. Argi dago diru hori ez dela erabiltzen gure lan-baldintzak eta erabiltzaileen zaintzaren kalitatea hobetzeko".
Halaber, sindikatuek adierazi dute Murillok grebalariak mehatxatu zituela. Edonola ere, langileek ez diote uko egin diputatuarekin biltzeari eta berarekin harremanetan jartzeko asmoa dute: "Bilera bat eskatu dugu Sergio Murillo Gizarte Ekintzako diputatuarekin, azalpenak eskatzeko eta exijitzeko bere gain hartzea Fundacion por la Integracion enpresa ez babesteko konpromisoa eta Ibarrako zentroa langileentzako kalitate parametroetan eta baldintza duinetan mantentzeko erantzukizuna".
Argazkiak: Samuel Pasandin Sanchez, LAB eta ESK sindikatuak