Gaur goizean sareratu du EITBko Gaztea kateko Kabia irrati saioak Ez naiz ni abestia. Kanta Artiñano Etxean grabatuta eta sortuta dago eta Aitzol Basaldua eta Enara Bravo nezakal etxeko jabeek argitu dute ideia Galder Izagirre saioko zuzendariarena izan zela: "Berak artistak elkartzen ditu lan bat sor dezaten eta Artiñano Etxea ezagutzen zuenez, Rozalén eta Zea Mays batzea bururatu zitzaion. Berez, leku aproposa iruditzen zitzaion inspirazioa bilatzeko".
Emaitzaren aldetik, oso pozik daude Artiñanoko kideak. "Oso naturala izan da sortu dutena", aipatu du Bravok.
Aitzol Basaldua, aldiz, oso hunkituta dago: "Etxeari omenaldia da eta horri buruz hitz egiten du abestiak. Oro har, bezeroak etortzen direnean, taldeko bati azaltzen dizkiogu etxearen nondik norakoak, baina Rozalén bakarrik etorri zenez, berarekin denbora luzez egon ginen hitz egiten eta azalpenak ematen. Bera oso adi egon zen eta gure sorpresa izan da abestiaren letra etxeari buruzkoa dela: haritza, egurra, sustraiak... Etxearen itxura ez ezik, bere arima eta mantentzeak eta zaintzeak zer suposatzen duen ere landu dute".
Edonola ere, Basaldua hunkituta zegoen aurretik: "Gu musikariak gara eta hemen jam saioak egin ditugu. Horrelako musikari ezagunak guren izatea, grabatzea, eta gurekin egotea ametsa betetzea izan da".
Grabaketari dagokionez, egun bakarrean egin zuten guztia artistek. "Etxeko gela ezberdinetatik mugitu ziren" erantsi du Enara Bravok. Sortzaileen arteko harremanari buruz galdetuta, biek oso argi dute: "Oso naturalak eta jatorrak dira. Pentsatzen genuen agian, jende ezaguna denez, txikiak egingo ginela euren aurrean, baina ez. Oso ondo moldatu ginen, eta ez bakarrik eurekin, baita talde teknikoarekin ere. Talde txikia zen, intimitatea mantentzeko".
Lan honetan catering ardurak ere hartu zituzten Artinaño Etxeko kideek eta ohiko lana baino nekezagoa izan arren, oso pozik daude emaitzarekin.
EITBk berak bideoa plazaratu du grabaketaren giroa islatzeko: