Zaloako Jai Batzordeak pozik bukatu du aurten auzuneko jaiei dagokienez. "Pandemiaren ostean, Orozkoarrek festarako gogo handiak erakutsi dituzte Zaloako jai gunea heldu zein gaztez beteta", adierazi dute.
Hiru eguneko egitaraua osatu zuten horretarako eta larunbateko giroa nabarmendu dute antolatzaileek: "Paella txapelketak sekulako arrakasta izan zuen 23 paellen arteko lehia estua sortuz. Bazkalosteko tailerrek eta jolasek umeen desirak bete zituzten eta, eguraldia lagun izanik, urezko puzgarrietan pasa zuten larunbata".
Musika izan zen asteburuko beste oinarrietako bat: "Ostiralean, Kittu eta Katilu taldeak aritu ziren, eta larunbatean, aldiz, Smoke Dealers ugaoarrek eta MoonShakers eta The Ganorabako´s herriko taldeek girotu zuten gaua".
Larunbatean, nahiz eta Zaloako Jaiekin harreman zuzena ez izan, Orozkoko Gure Esku Dagok jai gunea baliatu zuen Egileor eta Ubizar artean egin nahi zuen ekintza gauzatzeko. Berez, eguraldi lainotsua egon zenez, Zaloa argiztatu zuten.
Azkenik, igandean eman zieten bukaera aurtengo jaiei, pintxoekin, bertsolariekin eta porra txapelketarekin.
Argazkiak: Zaloako Jai Batzordea