Abenduaren 18an izango da Euskal Herriko Bertsolari Txapelketa Nagusiko finala, Iruñean. Uneotan finalerdiak jokatzen ari dira bertsolariak, eta Maialen Lujanbio Zugasti da finaleko txartela eskura duen bakarra, bera baita egungo txapelduna. Hargatik, zuzenean sailkatu da finalerako. Gainontzeko 7 bertsolariek finalerdietako bigarren itzulian pilatu beharko dituzte puntuak. Hain zuzen, Amurrion jokatuko da horietako bat, azaroaren 19an Bañueta kiroldegian.
Finalaren egunerako asko falta bada ere, Aiaraldeko bertso eskolak jarri dira jada antolakuntza lanetan. Sarrerak aspaldi agortu ziren, baina Iruñera hurbiltzeko garraio zerbitzua eskaintzea adostu dute Orozkoko eta Aiarako Bertso Eskolak. Izen-ematea posta elektroniko bidez egin beharko da, potolaribertso@gmail.com helbidera mezua bidalita, autobusez joan-etorria egin nahi duten pertsonen kopurua zehaztuz. Geldialdiak Amurrion, Laudion eta Orozkon izango dira. Irteera 8:00etan izango da Amurrion, eta jarraian beste herrietatik igaroko da autobusa.
Finala 11:00etan hasiko da, eta egun osoz jardungo dute zortzi finalistek kantuan. Hargatik, itzulera ordua 21:30 aldera izango da, bertso eskolen ustetan. “Data hurbildu hala jarriko gara harremanetan interesdunekin, irteera eta itzulera ordua zehazteko”, adierazi dute. Bien bitartean, Euskal Herriko Bertsolari Txapelketa Nagusiko saioez gozatzen jarraituko dute, emanaldi asko falta baitira.
