Abenduaren 22an onartu zuen Orozkoko udalbatzak, ez-ohiko saioan, 2023ko aurrekontuen hasierako onarpena. Hurrengo urteko aurreproiektuaren alderik nabarmena da 13 urteetan lehenengo aldiz hasiko duela udalak bere jarduera zorrik gabe. Aurreko ekitaldian 1.237.529 eurokoa zen zenbateko hori.
2022ra arte, 1.000 eta 10.000 biztanle bitarteko herrien artean Orozko izan da Euskadiko udalerririk zorpetuena
Horrez gain, iazko bitartekoak %9an handitu ditu, 5.855.830 eurokoa izango baita aurrekontua: 487.391 euro gehiago.
2023ko udal aurrekontua horrela banatuko da:
• Oinarrizko zerbitzu publikoak: %32, 1.873.865,6, iaz baino 584.788,6 euro gehiago.
• Gizarte-babeserako eta -sustapenerako jarduerak: %27, 1.581.074,1 euro, hau da, 2022an baino 6.0482,1 gehiago.
• Lehentasunezko ondasun publikoen ekoizpena: %22,6, 1.323.417,58 euro, hots, 133.312,5 euro gehiago.
• Jarduera ekonomikoak: %5,2, 304.503,16 euro, hau da. iaz baino 91.546,84 euro gutxiago.
• Jarduera orokorrak: %13, 761.257,9 euro, hots, 4.157,9 euro gehiago.
Udal Gobernu Taldeak hurrengo proiektuak nabarmendu ditu:
• Gizarte-ongizatearen arloan, bizikidetza-unitatea egoitzan abian jartzea, Orozkoko LGBT+ pertsonen bizitzei buruzko diagnostikoa eta horretan oinarritutako ekintza-plan integrala abian jartzea.
• Abeltzaintza-arloan, Life Silfore proiektua, nekazaritzako eta basogintzako sistemen erresilientziarako, eta aurrekontu sinboliko bat Aiaraldeko hiltegi berrirako.
• Hirigintzaren arloan, edateko uraren azpiegiturak hobetzea.
• Dirulaguntzen arloan, auzoetako jai guztien eta elkarteen aurrekontua handitzea, %50 eta %35, hurrenez hurren.
Oposizioaren aldeko bozkarik ez
Bai EAJk zein EH Bilduk ekidin zuten babesa ematea aurtengo udal aurrekontuen proiektuari. Hain zuzen, jeltzaleak aurka agertu ziren, eta EH Bilduk abstentzioaren aukera hartu zuen. Biek argudiatu zuten tokiko erakundeak inbertsioetarako diru gutxi bideratuko dituela. Alabaina, Adiek gehiengoa duenez, onartuta geratu dira 2023ko udal aurrekontuak.