.jpg)
Adiek bukatutzat eman du bere ibilbidea eta ez da datorren maiatzaren 28ko udal hauteskundeetara aurkeztuko. Hala azaldu du talde independeteak gaur Orozkoko auzoetan zehar banatzen ari den eskuorri baten bidez. Bertan, talde politikoko kideek azaldu dute "ziklo bat" bete dutela eta ez dela "erreleborik" iritsi. "Beti lan egin dugu umiltasunetik, zintzotasunetik, gardentasunetik, eraginkortasunetik eta zuzentasunetik", nabarmendu dute oharrean, eta eskerrak eman diete proiektuaren 12 urteko ibilbidean parte hartu duten pertsona guztiei.
Taldearen ibilbidearen balantzea ere plazaratu dute: "Adie 2010eko udan sortu zen eta talde sendoa eratzea lortu genuen, gaitasunarekin eta gure herriaren alde lan egiteko gogo eta ilusio akorekin". Modu horretan lortu zuten 2011ko hauteskundeetan gailentzea, eta orduz geroztik Adiek gobernatu du Orozkoko Udala. Urte hauetan guztietan, bizilagunen parte hartzea sustatu dutela nabarmendu dute, "parte hartzerako tresna berriak" eta "gauzak egiteko beste modu bat" abian jarriz.
Horrez gain, 2011n Udalak 5 milioi euroko zorra zuela gogorarazi dute, eta urtez urte saneatzea lortu dutela. Ildo beretik, proiektuaren independentzia ere jarri dute balioan: "Adiek talde independiente moduan, ez du ideologia politiko zehatz bat jarraitu. Gure asmoa beti izan da kudeaketarako eta parte hartzerako alternatibak proposatzea Orozkoko herritarrei. Gure jardun eremua Udala izan da soilik, eta ez dugu gure herritik haragoko lotura edo baldintzatzailerik izan".
Adie mapa politikotik desagertuta, ikusteke dago zer gertatuko den maiatzaren 28ko udal hauteskundeetan. Orozkoko Udalean beste bi taldek dute ordezkaritza: EAJk eta EH Bilduk, eta ez batak ez besteak ez dute jakinarazi momentuz zein izango den euren hautagaia.