LSB-USO sindikatuak deituta, AP68 autobideko Bizkaiko eta Arabako eremuko hainbat langile elkartu dira gaur 9:45etik 11:15era bitartean Orozkoko bidesariaren parean, bertan baitute egoitza.
AP68 autobidea MITMA taldearen barruan dagoen Grupo Abertis Autopistas enpresak kudeatzen du. 2019ko abenduaren 5ean Bizkaiko eta Arabako lurrak gurutzatzen dituzten 77 kilometroak bi lurralde historiko hauetako Foru Aldundien eskumen izatera igaro ziren. Hala ere, 2026ra bitarte Abertisek kudeatuko du autobidea, urte horretan amaitzen baita emandako kontzesioa.
Araban eta Bizkaian 70 langile baino gehiago daude eta ez dakite zer gertatuko den 2026tik aurrera euren lanpostuekin. Horregatik abiatu zuten duela urtebete baino gehiago hitzarmen kolektibo bateratu baten aldeko negoziaketa. Helburua, langileak irteera traumatikorik gabe berkokatu ahal izatea da; hau da, nahi duten langileek hurrengo enpresa kudeatzailean subrogatzeko aukera izatea eta nahi ez dutenek bidegabeko kaleratze baten saria jasotzea.
Horrez gaiz, Abertisek kudeatzen dituen beste autobideetako langileen baldintza berak eskatzen dituzte, eta langileen erosahalmena bermatu dadila.
Hori dela eta, gaur egin dute lehen elkarretaratzea Orozkoko bulegoen aurrean eta aurreratu dute Bizkaiko eta Arabako Foru Aldundiekin harremanetan jarriko direla. Negoziazioek blokeatuta jarraitzekotan, mobilizazio-egutegia adostuko dutela aurreratu dute langileek, eta ez dute lanuzterik egitea baztertzen.