Orozkoko guraso euskaltzaleen batzordeak euskararen arnasgune izan nahi du eta, horretarako, euskara hutsean familian aritzeko jarduerak antolatzen hasiko da. Lehena, ostiral honetan izango da, apirilaren 28an.
17:30ean jarri dute hitzordua Kantxan familiartean garrafak prestatzeko. Bi baldintza jarri dituzte parte-hartzeko: lehena, ekintzan euskara hutsean aritzea eta, bigarrena, aldez aurretik izena ematea. Horretarako epea aurreko egunera arte egongo da zabalik, hots, ostegunera arte.
Egitasmoaren bidez antolatzaileek euskararen arnasgune bat sortu nahi dute Orozkon. Horrek esan nahi du euskarak lehentasuna izango duela antolatzen dituzten jarduera guztietan.
Familiei zuzenduko dizkiete ekintzak, gurasoek haurrekin batera parte hartzeko. Horregatik, partaide helduei jarrera aktiboa eskatu diete jardueretan, hau da, haurrekin eta gainerako gurasoekin elkarrizketan aritzea eta, noski, euskaraz aritzea.
Azaldu dutenaren arabera, euskara mailak eta zuzentasunak ez dute garrantzirik izango, helburua “euskaraz gustura aritzea” izango baita. Euskaraz ez dakiten gurasoak beste guraso batzuekin hitz egitera gonbidatu dituzte antolatzaileek, hauen haurrek beste guraso batzuekin parte-har dezaten, heldu bakoitzeko hiru haurreko proportzioan.
Ereduaren garrantzia
Orozkoko guraso euskaltzaleen batzordeak azaldu du hainbat guraso arduratuta daudela herriko haurren hizkuntza ohiturekin. Izan ere, denek euskaraz ikasten duten arren, “beraien arteko harremanetan gaztelaniara jotzen dute gehienek”.
Horregatik, haurrei euskaraz ondo pasatzeko aukerak eman nahi dizkiete eta, argi dutenez gurasoek eredu izan behar dutela, ekintzak familian egiteko prestatu dituzte.
Izena ematean jardueran zehar jarrera parte-hartzailea izateko konpromisoa hartu behar dute gurasoek. Orozko Harana eskolak, Orozkoko Udalak eta UEMA Udalerri Euskaldunen Mankomunitateak lagundu du programazioan.
