Gorbeiako Parke Naturalaren inguruan dauden udalerriak ezagutzeko mendi-ibilaldi gidatuak eskainiko ditu Gorbeia Helmuga Turistikoak elkarteak. Gauzak horrela, Orozkon, Zeanurin, Diman, Areatzan, Ubiden eta Otxandion antolatu dituzte bisitak datozen bi hilabeteetarako.
Orozkoko auzoak ezagutzeko aukera
Orozkoko ibilaldiak irailaren 17an eta urriaren 7an egingo dituzte. 100 auzo baino gehiago eta milaka istorio izena jarri diote bisitari eta Bizkaiko bigarren udalerririk zabaleneko auzoak ezagutzeko aukera eskainiko die bisitariei.
"Orozkok ingurune pribilegiatua du, mendiak, basoak, kobazuloak, baserriak eta errekak nahasten dituena. Bisita gidatu honetan, txoko xarmangarriz inguratutako leku lasai hau ezagutuko duzu. Jauregi, dorretxe eta hamaika baserrik iragan indartsu eta landatarra erakutsiko digute Bizkaiko herri txiki honetan", nabarmendu dute ekimenaren sustatzaileek.
Azaldu dutenez, bisita gidatuak mota guztietako publikoari daude zuzenduak. Ez da gutxieneko parte-hartzailerik behar bisitak aurrera ateratzeko; baina, aurreratu dutenez, plaza mugatuak egongo dira. Bisita bakoitzaren ostean, gainera, pintxopotea ere eskainiko dute.
Prezioak izango dira 4 euro, 12 urtetik gorakoentzat; 2 euro, 8 eta 12 urte bitarteko neska-mutilentzat; eta doan 8 urtetik beherakoentzat. Prezioan pintxo-potea sartzen da bisita amaitzen den herrian. Orozkon Itxina Tabernan hartuko dute trago eta mokadua.