Itxiera mehatxuak gainditu ditu Ibarrako Madres Mercedarias egoitzak. LAB eta ESK sindikatuek adierazi dutenez, akordioa erdietsi dute zentroaren bideragarritasuna bermatzeko. Horrela jakinarazi zieten langileen ordezkariei Bizkaiko Foru Aldundiko, Aita Menni erakundeko, EDE Fundazioko eta Madres Mercedarias kongregazioko ordezkariekin azaroaren 10ean egindako bileran.
Enplegua bermatuta
Urtebete baino gehiago igaro dute Ibarrako egoitzako langileek itxieraren aurka borrokan. Sinatutako akordioaren arabera, Aita Menni Fundazioa arduratuko da zerbitzuaren kudeaketaz, eta langile guztien subrogazioari ekingo dio.
Sindikatuak pozik agertu dira, akordioak marrazten duen "agertoki positiboaren" aurrean. "Borroka luze honetan parte hartu duten langile guztiak zoriondu nahi ditugu, baita hain konbentzituta egon ez direnak ere. Badakigu gure borrokak Aldundiaren, Madres Mercedarias kongregazioaren eta, kasu honetan, Aita Menniren arteko negoziazioen erdigunean jarri duela konponbideak enplegua galduko ez zuela bermatzeko beharra", adierazi dute LABek eta ESKk.
Behin bideragarritasuna bermatuta, lan-baldintzen hobekuntzaren alde borrokan jarraituko dutela azaldu dute langileen ordezkariek. "Urte hauetan guztietan, Bizkaiko Foru Aldundiak zerbitzu publikoak pribatizatzeko egin duen apustuaren ondorioz, gure soldatak eta lan-baldintzak ahalik eta merkeenak izaten saiatu dira", azaldu dute sindikatuek. Egoera hori iraultzeko lana abiatuko dute orain.