2018an hasi ziren laino beltzak pilatzen Madres Mercedarias erlijio taldeak Ibarran duen zaintza zentroan. Han artatzen dituzte aniztasun funtzionala duten hainbat emakume eta duela bost urte Grupo Norte enpresak hartu zuen bere gain zerbitzuaren kudeaketa. Langileek zein erabiltzaileek berehala nabaritu zituzten eraginak; lan hitzarmena aldebakartasunez aldatu eta baldintzak okertu zituzten. Gainera, zerbitzuaren kalitateak behera egin zuen, beharginek salatu zutenez, pertsonal gutxiago baliatzen baitzuten zaintzetarako. Sindikatuek azpimarratu zuten Grupo Nortek eskala bikoitza erabiltzen zuela langile berriei 800 euro eskas ordaintzeko, asteburutan lan egitera behartu zituzten beharginak eta bi kaleratze gertatu ziren.
Horrek guztiak giroa nabarmen berotu zuen Ibarrako zentroan kontratatuta zeuden emakumezkoen artean (komenigarria da ez ahaztea zaintzen sektorea oso feminizatua dagoela) eta hainbat greba eta mobilizazio antolatu dituzte 2018tik gaurdaino. Protesta kopurua, gainera, izugarri areagotu da aurten, zentroaren gainean eroritako mehatxuaren ondorioz.
Urte hasieran jakinarazi zuten 73 emakume erabiltzaile eta 43 langile zaintzaile kale gorrian utziko zituztela, eta borroka zikloa abiatu zuten orduan beharginek.
Hain zuzen, Madres Mercedariasek iragarri zuten aurten izango zela euren azken urtea zentroan. Hau da, 73 emakume erabiltzaile eta 43 langile zaintzaile kale gorrian utziko zituztela. Arriskua bikotza zen. Alde batetik, Aiaraldean indarrean dagoen enplegua suntsitzeko joeran sakontzea. Bestetik, zaintzak eta arreta behar dituzten 73 emakume guztiz babesgabe uztea, zerbitzu hori jasotzeko itxaron zerrenda luzea baita. Hortaz, beharginen erantzuna hordagoaren tamainakoa izan zen, eta albistea jaso bezain pronto, astebeteko greba deitu zuten. Gero, hainbat eguneko grebak heldu ziren eta mobilizazio anitzak Orozkon, Laudion (eliza okupatu zuten apirilaren 23an eta egun osoko itxialdia egin zuten) eta Bilbon, Bizkaiko Foru Aldundiari exijitzeko zentroaren zerbitzua mantentzea. Ziklo luze horretan hainbat bidelagun topatu dituzte; Mugimendu Feminista, beste enpresetako langileak, Aiaraldeko Greba Batzordea... eta gatazkari eutsi diote.
Ahalegin horren ondoren, azaroan jakin izan zuten Madres Mercedariaseko zentroak jarraituko duela, eta Aita Mennik izango duela kudeaketaren ardura. LAB eta ESK sindikatuek (enpresan ordezkaritza dutenek) azpimarratu dute etengabeko mobilizazioari esker enpleguaren mantenua Bizkaiko Foru Aldundiaren eta gainerako eragileen agendan txertatu dutela eta horrela bermatu dutela behargin ororen subrogazioa.
Orain hori lortuta, ikusteke dago lan-baldintzen hobekuntza helduko den aro berri honetan eta, ondorioz, bake soziala itzuliko den Ibarran kokatuta dagoen zentrora edo, aldiz, borrokak jarraituko duen.