Arrigorriagako Bertso Eskolak bultzatuta, topaketa egin zuten larunbatean Orozkon. Enkarterriko eta Ezkerraldeko bertsolarien parte hartzea ez ezik, tokikoentzako tartea ere egon zen eta Serapio Lopez eta Juanjo Respaldiza batu ziren. "Eurekin egotea plazerra izan zen", adierazi dute antolatzaileek.
Xede nagusia izan zen bertso plaza formalagoak gogoko ez dituzten lagunei aukera ematea testuinguru lasaiagoan aritzeko. "Bertsolariak ginen gehienok eta giro goxoa sortu genuen, ikusle batzuk ere animatu ziren kantatzen", azaldu du Aitor Urrutia antolatzaileak. Arrigorriagako Bertso Eskolako kideak oroitu duenez, "pandemia eta itxialdia baino lehen", euren ideia zen Bertsotruk egitasmoa sustatzea, "baina ez zen posible izan. Helburua zen bertsolarien eta eskualdeen arteko ezagutza erraztea, baita kantatzeko beste moduak ezagutzea ere. Dena den, euskaldunak gara eta euskara kalera ateratzea beharra da guretzat".
Egitarauari dagokionez, 12:30ean plazan saio bat egin zuten eta jarraian beste bat tabernen artean. Juanjo Respaldiza izan zen protagonista lehenengoan eta Serapio Lopez bigarrenean.
Ondoren Supelaur elkarteko egoitzan bazkaldu zuten eta kantatzen. 17:00etan Bertso Eskolako eredua baliatu eta publikoari ere eman zioten aukera parte hartzeko. Amaitzeko tabernetara jo zuten.
Behin pandemiaren unerik kritikoenak igarota, lehen topaketa egin zuten eta bigarrena Aiaraldean izan da. Hurrengoa, ziurrenik, Ezkerraldean antolatuko dute.
Argazkiak: Arrigorriagako Bertso Eskola